Schad, ech haat mech suo dodrop jefreut, Adam on Eva ens kenne tu lieere. Nou mot ech wahl bes nächst Jooehr dooemöt waarde. Dann soll jooe die Urknall-Maschin en Genf irsch wier repariert sieen. Ech häb mech ens schlau jemäckt, wat et möt dä Riesenapparillo suo op sech hät. Dat Deng es en jruot Rüehr, wat deep onger de Erd leggt. Weäjes dat dat Rüehr wie enne jruote Hulahupp-Riep jebout es, hät et kinne Anfang on kin Eng. Et es also unendlich. Dooedren es et an een Stell möt minus 271° suo saukalt wie en dä Weltraum on an en angere Stell noch hieeter als wie medden en de Sonn. Dooedren kann m’r et also net uthalde. On en dat ronge Rüehr kajeäre nou klitzeklieene Dellekes, die m’r Protonen nennt, van lenks on reits möt affenartije Jeschwindigkieet openanger drop. On dat soll dä sojenannte Urknall avjeäwe. Nou wolle se möt dat Deng de irschde Sekund nach dä Urknall simeliere. Dat es also noch enne Uorembleck, bevür dat die Eva dän Adam en dä Appel hät biete looete.
Jetz frocht ihr natürlich, wat es dat dä Urknall? Ech well et öch vertälle. En dän Tiet, als et mar bluoß et Paradies jooev on sons nix, sooet ossen Herrjott Daag für Daag möt sin Engels dooe eröm on wuoß net, wat hä möt sinnen Tiet aanfange sollde. Av on tu jooev et ens en Harfenkonzert möt Jesang van dä Engelschor, dat wooer et. Ieenes Daags nou haat dän Erzengel Michael de Hieemelspooert ooepe stooehn looete. Bute wooer et suo kalt wie an die Minusstell en dat jruote Rüehr van Genf. Et trock dän Herrjott fies en et Kneck, on dooedrüewer wooerd hä ärg quooet. „Donnerondoria noch emooel! Ech krie enne stiefen Hals. Maak die Pooert tu!“ reep dän Alde on knallde die Düer suo faas en dä Rahm, dat et duor dat janze Paradies daverde. Suojar dä Belzebub, dä ongen en dä Heizungskeller sooet, feel vür Schreck bald en et Füer.
Dän Erzengel, dä sech jrad en schüene Wolk für tu reäste utjesoot haat, jing dä Knall duor de Küte. Hä kooem wie en jestooeke Kalv aanjeluope on reep: „Ohjottojott, et hät fies jeknallt!“ „Woröm häs do Knallkopp och die Pooert ooepe jelooete“, mullde Jottvatter, „wie oft soll ech dech noch sägge, dat dat treckt.“ Michael seit: „Et dieet mech jooe lieed, äwer van dä Knall fleje nou dooe bute en dat Nix enne janzen Huop jruote Knubbels on Knabbels duor de Jejend. Wuo kuomen die bluoß her?“ Dän Herrjott jing an et Fenster on kieek sech dän Duorieen aan, dä dooe en dat Nix eröm flooeg. „Endlich es ens jet loss he en dä langweilije Lade“, seit hä. „Für dat Inferno dooe bute säggen w’r Urknall. Dooe maaken w’r jet drut.“
Tja, on suo es et nou jekuome. Die Fulkerej wooer für die janze Engels am Eng. Dän Herrjott leet se allemooele aantreäne on verdellde dän Ärbet. Be die klendere Knubbels leet hä et Leet aanmake, dat jooeven de Steäre. En dä jrötzde Knabbel muoß de Heizung aanjemeit werde. „Dooe maaken w’r de Sonn van, domöt dat m’r sech net de Fott avfriert“, seit hä. „On dooe op dä Mooend, mot dat Leet suo jerejelt werde, dat m’r dat och ens op een Sie’ utmaake kann, sons wird dat tu düer. On van die ronge Kurel, die dooe langes dä Mooend flücht, dooe blivvt ihr schüen möt de Fenger van; die Erd, die maak ech mech selvs parat.“ Tja, on wat dooe drut jeworde es, dat wieete w’r jooe. Nou waart ech dodrop, dat die Urknall-Maschin en Genf wier repariert es. Ech mööt doch suo jeär Adam on Eva ens kenne lieere.
Op Platt hit et …
avjeäwe abgeben
Dellekes Teilchen
eäjes wegen
Fulkerej Faulenzerei
Hieemelspooert Himmelspforte
jestooeke Kalv gestochenes Kalb
Kneck Genick
Küte Waden
openanger aufeinander
quooet ärgerlich
reäste ausruhen
Riep Reifen
Rüehr Rohr
simeliere simulieren
Uorembleck Augenblick
Neulich stong ech et ooewes en die… wie hit se noch?… die Wieertschaft dooe an de Eck van die… öh… Dengensstrooet. Ech stong also dooe an et Rähmke. Neäwen mech kallden twiee Rentner openanger en. „Sägg, hässe all jehüert, dä… öh… Dengens, witse, dä Lange, dä die Süester van dä… wie hit dä doch noch?… Ja, es jooe och ejal. Also dä well jedenfalls nächste Weäk nach Italien en Urlaub fleje.“ „Es dat dä möt dä Krollekopp on die dicke Wratt op de Naas?“ „Och wat, dä doch net. Dä fährt doch möt sin Frau Jooehr für Jooehr nach… öh… wie hit et?…“ „Kann dä dann üewerhaupt spanisch kalle?“ „Wer?“ „Ja dä, wuo do mech van vertälle wolldes.“ „Wat soll dä dann möt Spanisch?“ „Ja wie? Do seits doch, dat dä dooe her fleje well.“ „Äwer doch net nach Spanien, dä flücht nach… öh… ja, jetz häste mech janz drut jebreit.“
„Sägg, wat ech dech ömmer all ens frooere wollde, dinne Schwooerer, dä möt die Jlatz, es dä eijentlich ömmer noch be die… öh… Dengens an’t wirke? Die sollen doch suo joot wie pleite sieen, wird jooe vertällt.“ „Och wat! Wer hät dech dat dann vertällt?“ „Ja, dat häb ech van dä… öh… wie hit dä doch noch ens? Ech kües et suo sägge… Ja, jedenfalls häm se dat en dä Friseurlade, dooe an die Eck van die… öh… Dengensstrooet, dooe häm se dat vertällt.“
„Dooe seit doch vürije Weäk minne Nobber van teäjenüewer für mech…“ „Wer? Dä Dicke möt die Knubbelsnaas?“ „Nä, dä net, dän angere, dä neäwen däm wonnt, dä… öh… jetz fällt mech dä Naam jrad net en. Also, dä minde für mech, dat die Frau van dä Keärl van die Tankstell op de… öh… wie hit die Strooet an dä Dengenspark doch noch ens?… Also, dä vertällde mech, dat die möt enne Schwatte duorjebrännt wöer..“ „Jo? Sägg bluoß.“ „Ja, äwer dat kann jooe jarnet sieen.“ “Woröm dann net?” „Ja, weäjes dat dä Tankstellekeärl jooe üewerhaupt jarkin Frau jehatt hät.“ „Ja, dann kann die jooe och net duorjebrännt sieen.“ „Eäwes.“ „Es dat dann ieene ut Afrika?“ „Wer?“ „Ja, dä Schwatte.“ „Dat wieet ech doch net. Däm kenn ech doch jarnet.“
„Witse eijentlich, wer och duot es?“ „Nä, wer dann?“ „Ja, ech wieet net, ob do däm jekännt häs. Dä wonnde jooe he öm de Eck be die aal… öh… witse, die möt dä jruote Balkon vür de Bross on die Frasselsfrisur, die ömmer bluoß üewer angere Lüh an’t klapeie es… Ech häb mech däm sinne Naam noch nie merke könne, suo ähnlich wie „…rowski“ hengen draan off suo jet.“ „On dä es duot?“ „Ja, vürije Weäk hät öm dä Schlag jetroffe. On dä wooer jooe übrijens enne Vetter mütterlicherseits van dä… öh… Dengens, van däm ech dech vertällt häb, dat dä nächste Weäk nach Italien flücht.“ „Dooe kannste ens sieehn, wie klieen de Welt es.“ „Ja, dooe sässe jet.“
Op Platt hit et:
druut jebreit durcheinander gebracht
duor jebrännt durch gebrannt
kalle sprechen,
erzählen
Kubbelsnaas Knollennase
Körte Schnaps
Krollekopp Lockenkopf
kües könnte
Nobber Nachbar
Rähmke Rähmchen (in
der Kneipe)
Schwooerer Schwager
Süester Schwester
teäjenüewer gegenüber
Vertäll Erzählerei
wirke arbeiten
Bontenakels Küeb es seit nöies Kleinjärtner jeworde. Dä Jaart wooer en jerejelt Schnäppke, schüen aanjeleit möt Plante on Blome. Henger de Wies en fein Holthüske, enne Tümpel möt Joldfesch dren on en Stöck für Eärpel on Jemöis drop tu pooete. Ärg düer sollden dat klieene Paradies och net sieen. Möt die Lüh, die dä Jaart avjooeve, wooerd m’r sech flott einig. Die Nöijärtner kuoße et Mirschde van dä Inventar on dä Jaardeswerkelskrooem üewerneähme. Nou stung Küeb dooe – van nix en Ahnung, äwer Kleinjärtner. Suovüel wuoß hä: wat bonk es, dat send die Blome, on alles wat jröin es, dat send Plante, Strüker, Jemöis off Jras. Et kann äwer och Onkruut sieen. Dat mot m’r joot utrieen halde.
Als die Fröihjooerssonn et irschde Kiehr erut kooem, jing Männ en sinne nöie Jaart on wollde wat duon. Bluoß wat on woröm on möt wat für’n Werkelszeug? Hä bekieek sech die Beete möt Strüker on jröine Blättches, die vürsechtig ut de Erd erut luorde. En paar jeäle on blaue Blömkes kieeke och all möt et Köppke erut. Dann beluorde Küeb sech en dä Schopp die Schöppe on Härke on Krätzkes on Pöttches on Blöskes möt Samen on Dünger on wat et sons noch alles für ’ne Krooem jooev. Äwer hä kuoß kinne Verstank an dat janze Zeug draan krieje.„Morje es och noch ennen Daag“, seit hä vür sech, „dann kann ech ömmer noch he eröm stalpe. En bödsche Fulke kann nix schade.“
Op Platt hit et:
aanjeleit angelegt
beluore belauern
bonk bunt
Eärpel on Jemöis Kartoffeln und Gemüse
et irschde Kiehr erstmals
Fierooevend Feierabend
fulke faulenzen
Jaardesnobbere Gartennachbarn
Jaardeswerkelskrooem Gartengeräte
Jrieet Margarete
kajeäre rasen
Küeb Jakob
pooete pflanzen
Strüker Sträucher
Ech eät jooe für min Leäwe jeär en Schiev lecker Jraubruot möt Jriebenschmalz drop. Dat Bruot mot äwer janz fresch sieen, dann schmeckt dat et beäst. Desweäje jank ech mech en de Stadt ömmer dat leckere Heidebruot möt die knackije Köersch jelle. Ihr wit jooe sieeker, wuo m’r dat krett. Des Daag stong ech wier en dä Bäckerlade dren. Dooe hüerden ech, wie neäwen mech en Frau sät: „Ich hätte jern enne Pottweck mit ohne alles“. Die Verkäuferin kieek jet klöchtig dren, schöddelde dä Kopp on seit: „Wir haben Butterpottweck und Pottweck mit Rosinen oder Mandeln. Welchen möchten Sie denn haben?“ „Ja, dä mit ohne alles drin.“ Dat Wiev henger de Thieek haat net ärg vüel Humor on wooerd en bödche quooet. „Mit ohne – das widerspricht sich ja. Was möchten Sie denn nun haben?“
Dooe kuos ech net miehr de Schnuut halde. „Ihr sed wahl net van he“, seit ech. „Die Frau well enne Pottweck jelle, wuo kin Krente dren send on och kin Mandele – möt ooehne alles eäwes. En Krieewel sät m’r dat suo.“ „Dat wüst‘ ich aber“, minde die angere Verkäuferin, „dat hab ich noch nie jehört.“ „Ja, dann sedder wahl noch net lang jenoch en Krieewel.“ „Wollen se uns nur belehren, oder wollen se auch wat kaufen? Wat darf et denn sein?“ „Dann dot mech mar een van öier Heidebruot, dat schmeckt jooe jar net suo unübel.“ „Wie tut dat schmecken – unübel? Dat verbitte ich mich aber.“ „Nix für onjoot,“ seit ech, „dooemöt wollden ech bluoß sägge, dat dat Bruot be öch ärg lecker schmecke dieet.“
Suo es dat jooe vandaag. Et jövvt net miehr ärg vüel Lüh, möt dänne m’r sech noch op echt Krieewelsche Art ongerhalde kann. Vür Jooehre, als „Et Bröckske“, noch ooepe wooer, dooe kuos m’r dooe noch ömmer van die Jeäs vüel Krieewelsche Tüen hüere. Dooe häbben sech die alde Krieewelsche ömmer jeär jetroffe, für öm üewer det on dat tu kalle. Wenn dä Nöibou feärdig es, soll jooe dooe onge wier en Kneipe eren trecke, häb ech jehüert. Ov dat Heimatjeföhl dann wier en klieen bödche turöck kömmt, wenn dooe demnächst wier de Pooert ooepe jemäckt wörd – schüen wöer et jooe. Äwer ov dooe een van die nöimodische „Börger-Restaurants“ joot für es – ech wieet et net.
Op Platt hit et …
jar net suo unübel gar nicht schlecht
Jeäs Gäste
jelle kaufen
kalle sprechen
Kieek jet klöchtig schaute etwas seltsam
Köersch Kruste
Krente Rosinen, Korinten
Leäwe Leben
Lüh Leute
nix für onjoot (Redensart)
Nöibou Neubau
Pooert Tür, Tor
quooet ärgerlich
Schiev Scheibe
Tüen Töne
